Wednesday, August 16, 2017

"မြင်ကွင်းကျယ် ..။"

"မြင်ကွင်းကျယ် .." by 99

"တိမ်" ..
မဟုတ် ..
ယမ်းငွေ့ ..
မီးခိုး ..
"မှိုင်း" အသွယ်သွယ် ..
မိုးလုံး အပြည့် ..
နှင်လေရာ ..။
 

-- 99 --
16/ Aug/ 2019

Saturday, August 12, 2017

"မပျောက်ဆုံးခင် ..။"

ဒီလိုပါပဲ ..
တနေ၀င် တနေထွက်မှာ ..
ရင်းနှီးခဲ့တဲ့ အကျွမ်းတ၀င် ရှိမှုတွေ ..
တလွှာခြင်း ကွာကျလို့ ..
တရာသီဝင် တရာသီအထွက်မှာ ..
လွမ်းဆွတ် တမ်းတခြင်းတွေဟာ ..
တပွင့်ခြင်းစီ နှုတ်ဆက်လက်ပြ ..
တဖြုတ်ဖြုတ်နဲ့ ကြွေကျနေကြရှာတယ် ..။

အလွမ်းထုရဲ့ ကန့်လန့်ကာနောက်မှာ
ရစ်ထွေး ယက်လုပ်နေဆဲ ..
တွယ်တာစရာ နှောင်ကြိုးတွေလည်း ..
တကြိုးပြီး တကြိုး ..
ပြေလျော့ ..
ပြတ်တောက် ..
နောက်ဆုံးတော့ ..
အငွေ့ပျံ .. .. .. ပျောက်ဆုံး ..။

ငှက်တွေတောင် အဝေးပျံကုန်ကြပြီ ..
အေးလေ ..
အားလုံးဟာ ..
သဘာဝတရားရဲ့ အလိုတော်အတိုင်းပါပဲ ..။

[နောက်တရာသီမှာ ..
မုန်သုံသယ်ယူလာမယ့် ..
တိမ်တိုက်တွေထဲ ..
(အလွမ်းတွေရယ်)
မမေ့မလျော့နဲ့ ပြန်လာခဲ့လိုက်ပါ ..
ချစ်ခြင်း တောအုပ်တွေ ..
လန်းဖြာ ကျန်းမာစေဖို့ပါ ..။]

-- 99 --
12/ Aug/ 2017
"သက်တန့်ရောင် ဘ၀များ .." by 99

Sunday, July 23, 2017

"သုညရဲ့လှိုင်း ..။"

ညီမလေးရေ ..
ငှက်တွေတောင် 
အိမ်ပြန်ကုန်ကြပြီ ..
ငါ့မှာတော့ အရွေ့သုညမှာ 
ရပ်မြဲ ရပ်နေရဆဲပါပဲ ..။

နှလုံးသားရဲ့ ကွန်တိုလှိုင်းတွေ
အနိမ့်အမြင့် မညီမညာ ဖြစ်ရတဲ့အခါ ..
ဂစ်တာကြိုးညှိခဲ့ကြတဲ့ ကာလတွေကို
မဆီမဆိုင် ..
လွမ်းဆွတ်နေမိတော့တယ် ..။

အဲ့ဒီတုန်းက ..
ငါက ဂစ်တာကြိုးညှိ ..
ညီမလေးက အနားမှာ ရယ်မော ..
ဂစ်တာအိုလေးရဲ့ ကြိုးတွေ 
အလွယ်တကူ ညှိလို့မရပေမယ့်
နှလုံးသားရဲ့ ကွန်တိုလှိုင်းတွေ
အတိုင်းမသိ ညီညွတ်ခဲ့ကြတယ် ..။

ညီမလေးရေ ..
ဘ၀ဆိုတာ ..
ချိုမြသာယာတဲ့ သံစဉ် တပုဒ်တဲ့ ..။
ဒီတခါတော့ .. င့ါရင်ထဲက သံစဉ်ချိုလေး ..
ညီမလေးကို နားထောင်ခွင့်ပေးအုံးမယ် ..
ခေါင်းမာ တင်းခံနေသေးတဲ့ ..
အခါးလှိုင်းတွေ .. 
အန်ထုတ်ပြီးတဲ့ အခါကျရင်ပေါ့ ..။

--99--
24/ July/ 2017
 
"ညီမလေးအတွက် .." by 99

Monday, July 17, 2017

"မိတ်ဆွေ ..။"

သေခြင်းတရားကို ..
ကြောက်ရွံ့တဲ့ အခါ ..
နေခြင်းတရားဟာ ..
အိပ်ပေါက်နဲ့ ဖားကောက်နေရသလို ..။

သေခြင်းကို ကျောခိုင်း .. 
မသိ ကျိုးကျွန်ပြုထားတဲ့ အခါ ..
နေခြင်းရဲ့ ပျော်ရွှင်စရာဟာ ..
ခုတောက်ပြီး .. ခုငြိမ်းတဲ့ .. 
ကောက်ရိုးမီးမှုန် တစသာသာ ..။ 

တကယ်တော့ ..
သေလွန်ချိန်အတွက် ..
အသီး အပွင့်တွေဟာ ..
ရှင်သန်ချိန်ရဲ့ ..
ပေါင်းသင် ပျိုးထောင်ရာက ..
ပြောင်းလဲ ဖြစ်တည်လာခဲ့ရတာ ..။

ဒီတော့ ..
ပေ့ါပါး စစ်မှန်တဲ့ ..
နေခြင်းတရားအတွက် ..
နောက်မကျသေးခင် ..
(သူ့ မျက်နှာခြင်းဆိုင်က ..)
သေခြင်းတရားနဲ့ ..
ခေါ် .. ပြော ..
ရင်းနှီး ..
မွေ့လျော်ကြစို့ရဲ့ ..။ 

-- 99 --
17/ July/ 2017



Wednesday, July 5, 2017

"အိပ်မက် ..။"

"Dream" -- sketch on Note 3 by 99
အိပ်မက်တချို့က တောက်ပဖို့ ..
အိပ်မက်တချို့က ချောက်ချဖို့ ..
အိပ်မက်တချို့က ..
ရိုးရိုးသားသား ရင်ခုံရုံ ..
အိပ်မက်တချို့က ..
မှောက်မှောက်မှားမှား ပျော်ရွှင်ရုံ ..
အိပ်မက်တချို့ ..
လေဟုန် စီးကောင်းနေတုန်း ..
အိပ်မက်တချို့ ..
တွင်းနက်နက်မှာ ပိတ်မိနေဆဲမို့ ..
လက်လွှတ်ခြင်းဖြင့်သာ ..
လက်ခံပေးလိုက်ပါ ..။ 


-- 99 --
5/ July/ 2017

"ဘ၀ ..။"

"Life" -- sketch on Note 3 by 99
မိုးထဲ ..
လေထဲ ..
မြက်ရိုင်းပင်
ရှည်ရှည်လေးရဲ့ ..
အဖျား စုစုလေးပေါ်မှာ ..
တွဲလွဲခို ..
ရှင်သန် ..
ပျော်ရွှင်နေတဲ့ ..
မိုးစက်လေးဟာ ..
ကျနော် .. ။


-- 99 --
4/ July/ 2017

"အပျော် ..။"

ယုံကြည်ရာမှာ ..
ပျော်ရွှင်နေတာ ..
အောင်မြင်တာပဲ ..။ 

-- 99 --
3 July 2017
"City" -- sketch on Note 3 by 99

Sunday, May 28, 2017

"နောက်ကျခဲ့တယ် ..။"

၂၁ နှစ် ..
ပြန်တွေ့ရင် မှတ်မိပါ့မလား ..။
ကျနော့်ဆံပင်တွေတောင် ညှပ်ထားတယ် ..
(မှတ်မိလို မှတ်မိငြား ..)
ဒါပေမယ့် ..
"ပြန်ဆုံခွင့်" ဆိုတာ မရှိနိုင်တော့ပါဘူး ..။


ချစ်ခြင်းကို ချစ်ခြင်းသက်သက်နဲ့ ..
ဖေးမခွင့် မရခဲ့တဲ့ ကာလတွေအတွက် ..
ဇာတ်နာတယ် ..။


နောက်ဆံတင်းတင်း ပျော်ရွှင်စမ်းပါလို့ ..
တိုက်တွန်းခွင့် မရခဲ့တာတွေအတွက် ..
ဇာတ်နာတယ် ..။


နောက်ဆုံးတွေ့ခဲ့တုန်းက ..
ညို့ညို့မှိုင်းမှိုင်း စွတ်စွတ်စိုစို အိမ်အပြန် ညတခုအတွက် ..
ဖြောင့်တန်းညီညာတဲ့ လမ်းတခု ..
ညွှန်ပြမပေးလိုက်နိုင်ခဲ့လို့ ..
ဇာတ်နာတယ် ..။


ခုနေ ပြန်တွေ့ရင် ..
ချစ်ခြင်းဟာ ..
ငြိမ်းချမ်းတယ် ဆိုတာလောက်တော့ ..
ပြောပြချင်တယ် ..။ 


အပူလွင်ပြင်မှာ ဖြတ်သန်းရတဲ့အခါ
နောက်ကြောင်းအေးတဲ့ အပြုံးတွေနဲ့
ရှေ့ဆက်နိုင်တာ ပြောပြဖြစ်လိမ့်မယ် ..။


ရှင်ကွဲ ဆိုတာ ..
သုံးသပ်ခွင့် .. ပြင်ဆင်ခွင့် ..
အဝေးကနေ ဆုတောင်းနေခွင့်ရှိနေသေးလို့ ..
ဘယ်လိုဖြစ်ဖြစ် အပြန်တရာ ကောင်းနေသေးတယ် ..။


လောလောဆယ်တော့ ..
တရေးနိုးအတွေးမှာတောင် ..
ဘယ်အရပ်မှာ ရှိနေနိုင်တယ်ဆိုတာ
မသိနိုင်တဲ့ ခွဲခွာခြင်းနဲ့ အဆုံးသတ်ရတာ ..
ဇာတ်အနာဆုံးပဲ ..။


အသိုင်းအ၀ိုင်းရဲ့ စံနှုန်းတွေအလိုကျ ..

ကျနော် လူလားမမြောက်သေးပေမယ့် .. 
ချစ်ခြင်းတွေနဲ့ အလွမ်းတွေတော့ ..
လူလားမြောက် ရင့်ကျက်နေပါပြီ .. ဆိုတာလေး
စကြာဝဠာလှိုင်းတွေက တဆင့် ..
အမှာပါးချင်တယ် ..။ 


ကျနော့် ချစ်ခြင်းတွေ
လက်ခံရရှိပါစေ ..
ရောက်လက်စ တနေရာရာမှာ ..
ဟောဒီ ချစ်ခြင်းစစ်စစ်တွေရဲ့ ပွေ့ပိုက်မှုမှာ ..
ငြိမ်းချမ်း ပျော်ရွှင်နိုင်ပါစေ ..။

-- 99 --
၂၉ မေ ၂၀၁၇။

Wednesday, February 22, 2017

"မေတ္တာပန်း ..။"

ကမ္ဘာမှာ ..
လောက အကြည်ဓာတ် အတွက် ..
ပန်းတွေ .. ပွင့်ကြတယ် ..။


ကျေကျေနပ်နပ် ..
သေသေသပ်သပ် ..
အငြိုးအတေး မရှိ ..
အတွက်အကပ် မရှိ ..
အသွား အပြန် မလို ..
မေတ္တာချိုချိုနဲ့ ..
ပန်းတွေ .. ပွင့်ကြတယ် ..။ 


ပန်းတွေ နှလုံးသားက ..
ဆန့်ထုတ်လိုက်တဲ့ .. ရက်ရောမှု
မြင်သူရင်ကို ဗဟိုပြု ..
ကြည်နူးမှု အစုစု ဖြစ်စေတဲ့ လှိုင်း ..။ 


တစ်ယောက်ကနေ တစ်ရာ ..
ကြည်နူးခြင်း လှိုင်းများ ..
ကူးလူး .. ပျံ့နှံ့ ..

အားကောင်း ဝေဖြာပါ ..

[အကြည်ဓာတ်အတွက် ..
အကြည်ဓာတ်လေး သယ်ဆောင်ခဲ့ရန်သာ ..။] 

-- 99 --
၂၂ ဖေဖော်ဝါရီ ၂၀၁၇။

Wednesday, January 11, 2017

"နတ်ဆိုးရဲ့ ကြိုး ..။"

ငါဟာ ..
ငါကိုယ်တိုင်အတွက် နတ်ဆိုး .. ။
ဗြတ်စောင်းအိုဆီက ..
သံစဉ်ချိုတွေသာ ..
ငါ့နှလုံးသားကို ပွေ့သိမ်း ..
နားချနိုင်ရဲ့ .. ။
ဒါပေမယ့် ..
ကြိုးညှိ မိုးလင်းတွေနဲ့တော့ ..
ခပ်ဝေးဝေး နေမယ်ကွယ် .. ။

-- 99 --
၁၂ ဇန်န၀ါရီ ၂၀၁၆။

"ပွင့်ချိန် ..။"

ဒီမျက်တောင်မည်းလေး အပင့် ..
ငါ့ စကြာဝဠာထဲ ..
ပန်းတွေ .. ပန်းတွေ ..
အပြိုင်းအရိုင်း .. ပွင့် ..။

-- 99 --
၁၀ ဇန်န၀ါရီ ၂၀၁၇။

Thursday, January 5, 2017

လွတ်လပ်တဲ့ .. စိတ် ..။

လူတိုင်းပဲ စိတ်လွတ် လက်လွတ်နေရတာကို နှစ်သက်ကြတယ် ..။ ကိုယ့်ဘ၀ကို ကိုယ်ထင်သလို ကိုယ်ပျော်သလို နေချင်တတ်ကြတယ် ..။ ဖြစ်နိုင်ရင် ကိုယ့်လွတ်လပ်မှုထဲကို .. တခြားသူ ၀င်ရောက် စွက်ဖက်တာတို့ .. အကြံပြုတာတို့ .. အမိန့်ပေးတာတို့ .. ဘာတခုမှ မလိုချင်ကြဘူး ..။ ဘ၀ရဲ့ အစစ်အဆေးနဲ့ အထုအထောင်းတွေ .. လူ့အသိုင်းအ၀ိုင်းရဲ့ စည်းနှောင် ဘောင်ခတ်မှုတွေ .. ဟာလည်း စိတ်လွတ်လပ်မှုကို ကန့်သတ် .. ချုပ်နှောင်နေတဲ့ အကြောင်းတရားတွေလို့ .. (အနည်းနဲ့ အများ) လက်ခံထားကြတယ် ..။

လူရယ်လို့ ဖြစ်လာတဲ့အခါ .. မျှော်လင့်ချက် ၀န်ထုတ်တွေ .. ပေးဆပ်စရာ ၀န်ထုပ်တွေ .. တပုံကြီး ထမ်းလို့ .. မြင်နိုင် မမြင်နိုင်တဲ့ ကြိုးပေါင်း မြောက်များစွာ .. တုတ်နှောင်ခြင်း ခံထားရတာ သဘာဝပါ ..။ မိသားစုအတွက် .. လူ့အသိုင်းအ၀ိုင်းအတွက် .. လိုက်နာ စောင့်စည်းရမယ့် ကျင့်ဝတ်တွေ .. ဖြည့်ဆည်းရမယ့် တာဝန်တွေ ..။ အဲ့ဒီအတွက် လေးလံ ဖိစီးရတဲ့ စိတ် ..။ ကိုယ့်ဘ၀ ရပ်တည်မှု .. ယုံကြည်မှုနဲ့ ရှင်သန်မှုတွေ တထပ်တည်း မကျတဲ့အခါ .. ကြေကွဲဆို့နစ်လို့ ..အသက်ရှုကြပ်ရတဲ့ စိတ် ..။ ကိုယ်ယုံကြည်ရာတွေနဲ့ ပတ်ဝန်းကျင် အသိုင်းအ၀ိုင်းရဲ့ ယုံကြည်မှုတွေ ဆန့်ကျင်ဘက် ဖြစ်နေတဲ့အခါ .. အားတင်း တောင့်ခံရင်း .. ဒွိဟစိတ်တွေကို တွန်းလှန်ရင်း .. မောပန်းနွမ်းနယ်ရတဲ့ စိတ် ..။ ဘယ်လိုပဲ ဖြစ်ဖြစ် .. လွတ်လပ်ခွင့် မရတဲ့ .. စိတ်ပေါင်း အသင်္ချေ .. အသက်ရှင်သန် နေသရွေ့ .. ကြုံတွေ ဖြတ်သန်းနေရအုံးမှာပါ ..။

ဒီတော့ .. လွတ်လပ်တဲ့ စိတ်ဆိုတာ .. ဘယ်လိုမျိုးလဲ .. ဘယ်အခါမှ လွတ်လပ်မှာလဲ .. ဘယ်လို ကြိုးစားမှ လွတ်လပ်မှာတဲ့လဲ ..။

တကယ်တော့ .. လွတ်လပ်တဲ့ စိတ်ဆိုတာ .. စိတ်လွတ်ကိုယ်လွတ် မတွေးမဆ နေချင်သလို နေတာမျိုးကို .. ပြောတာလည်း မဟုတ်ဘူး ..။ မိသားစု၊ လူ့အသိုင်းအ၀ိုင်းရဲ့ စည်းဘောင်တွေကနေ .. တရားဝင် လွတ်လပ်ခွင့် ရတာမျိုးလည်း မဟုတ်ဘူး ..။ ဆင်းရဲကြပ်တည်းမှု .. မတရား ဖိနှိပ်မှု .. ငြင်းပန်းနှိပ်စက်မှု နဲ့ အချုပ်အနှောင် တွေကြောင့် .. မလွတ်မလပ် ဖြစ်နေတာမျိုးလည်း မဟုတ်ဘူး ..။ အာဏာရှိမှု .. နာမည်ကျော်ကြားမှု .. လုပ်သမျှ အောင်မြင်မှု .. စည်းစိမ် ဥစ္စာ ပြည့်စုံမှု .. သက်တောင့် သက်သာနဲ့ ဘ၀ကို ငြိမ့်ငြိမ့်ညောင်းညောင်း ဖြတ်သန်း မှုတွေကြောင့်လည်း .. ငါ့ စိတ်အလိုရှိရာ လွတ်လွတ်လပ်လပ် လုပ်နိုင်တယ်ဆိုပြီး .. လွတ်လပ်နေတာမျိုးလည်း မဟုတ်ဘူး ..။ 

စိတ်ဟာ ဂုဏ်တက် .. မာန်တက် .. မောက်မာနေပြန်ရင်လည်း လွတ်လပ်တဲ့ စိတ် မဖြစ်ပြန်ဘူး ..။ 
"ငါလို သီလ လုံတဲ့လူ မရှိ .. ငါ့လို အများ ကောင်းကျိုး လုပ်နေတဲ့လူ မရှိ .." စသဖြင့် ကိုယ့်ကိုကိုယ် အမွှန်းတင်နေရင်လည်း စိတ်ဟာ တင်းမာ ကျွတ်ဆတ်နေပြန်တယ် ..။ အဖိနှိပ်ခံရမှာ ကြောက်လို့ (ဒါမှမဟုတ်) ဖိနှိပ်ခွင့် မရတော့မှာ စိုးလို့  .. ဆိုတဲ့ စိတ်မျိုးတွေ ဖြစ်ရင်လည်း .. စိတ်ဟာ အဂတိ တရားတွေနဲ့ ငြိစွန်းနေလို့ မလွတ်လပ်တော့ ပြန်ဘူး ..။

လွတ်လပ်တဲ့စိတ် ဖြစ်လာတဲ့အခါ .. စိတ်ဟာ သန့်စင်စွာ .. အရောင်ကင်းစွာ .. အဂတိကင်းစွာ .. ကိုင်းညွတ်မှုကင်းစွာနဲ့ တည်ကြည် ငြိမ်သက်လာတယ် ..။ ပတ်ဝန်းကျင်ရဲ့ အခြေအနေတွေ .. ပြောင်းလဲမှုတွေ .. တိုးတက်ခြင်း ဆုတ်ယုတ်ခြင်းတွေဟာ "ငြိမ်သက်နေတဲ့ စိတ်" အပေါ် သက်ရောက်မှု မရှိနိုင်တော့ဘူး ..။ ပတ်ဝန်းကျင်ရဲ့ ဖိအားနဲ့ သာယာမှုတွေကနေ .. ရွေးချယ်မှု ကင်းစွာနဲ့ .. တစတစ လွတ်လပ်လာတယ် ..။ အားကောင်း နက်ရှိုင်းစွာ စီးဆင်းနေတဲ့ .. မြစ်တစင်းလိုပဲ .. သန်သန်မာမာ .. ပျော်ရွှင်စွာနဲ့ .. ဘာအရာကိုမှ ဖမ်းချုပ် ဆုပ်ကိုင်ထားစရာ .. သိုဝှက် သိမ်းဆည်းစရာ မလိုတော့အောင် .. လွတ်လွတ်လပ်လပ် စီးဆင်းလေတော့တယ် ..။

သတင်းစာဆရာကြီး ဦးဝင်းတင်ဟာ သူ့ဘ၀တလျှောက်လုံးမှာ .. ဘယ်အရာကိုမှ သိမ်းဆည်း ကွယ်ဝှက်မထားပဲ .. အမှန်ကိုသာ ပြော .. အမှန်ကိုသာ ကျင့်သုံး .. ရှိသမျှကို ဝေမျှခဲ့လို့ .. တံခါးဖွင့် ၀ါဒကို ကျင့်သုံးသူလို့ နာမည်ပေးခံခဲ့ရတယ် ..။ တကယ်တော့ .. သူ ကျင့်သုံးတဲ့ တံခါးဖွင့် ၀ါဒဆိုတာ .. နှလုံးသားနဲ့ စိတ်ကို ဖွင့်ပြီး ကျင့်သုံးတာလို့ ပြောရမယ် ..။ သူ့စိတ်က လွတ်လပ်တဲ့ လေစီးကြောင်းလို .. ရေစီးကြောင်းလို .. သူနဲ့ ထိတွေ့ခွင့်ရသမျှ စိတ်နှလုံးသားတွေ အပေါ် .. လွတ်လပ်မှု အပြည့်နဲ့ စီးဆင်းပေးခဲ့တယ် ..။ ဘယ်သူ့အပေါ်မှာမှ မလွတ်လပ်တဲ့ စိတ်နဲ့ .. မကိုင်းညွတ်ခဲ့ဘူး ..။ အားလုံးကို သာတူ ညီမျှစွာ .. ငြိမ်သက်တဲ့ စိတ်ကို ဗဟိုပြုလို့ .. သူ့စိတ်ရဲ့ လွတ်လပ်ခြင်း တရားမျှတခြင်းကို ခံစား ထိတွေ့စေခဲ့တယ် ..။  သူ့လုပ်ရပ်တိုင်းဟာ .. နာမည်ရဖို့ .. ဥစ္စာရဖို့ .. နောက်လိုက်ခြွေရံ များဖို့ .. သြဇာကြီးဖို့ .. စတဲ့ မျှော်လင့်ချက် စိုးစဉ်းမှ မပါဝင်ခဲ့ဘူး ..။ ဘယ်အရာကိုမှ ပိုင်ဆိုင်ဖို့ မဟုတ် .. ဘယ်ဂုဏ်အတွက်မှ လုပ်ကိုင်ခဲ့တာ မဟုတ်လို့ သူ့စိတ်ရဲ့ လွတ်လပ်မှုဟာ .. အင်အားကြီးမားတယ် ..။

ကမ္ဘာကျော်အဆိုတော် ဘော့ဘ်မာလီက ..
"စိတ်ရဲ့ကျေးကျွန် အဖြစ်ကနေ .. လွတ်မြောက်အောင်လုပ်ပါ ..
ကိုယ့်စိတ်ကနေ လွတ်မြောက်ဖို့ ..
ကိုယ်ကိုယ်တိုင်ကလွဲလို့ .. ဘယ်သူမှ မကူညီနိုင်ပါဘူး" တဲ့ ..။

မိမိကိုယ်တိုင်ရဲ့ .. ဖိနှိပ်ခြင်းနဲ့ မျှော်လင့်ချက်တွေကို .. တွန်းလှန်လာနိုင်တဲ့အခါ .. .. ..
စိတ်ဟာ ..
ဒေါသကနေ လွတ်လပ်လာတယ် ..
တွေဝေမှုတွေကို ဖြိုခွဲ တွန်းထုတ်ပြစ်လာနိုင်တယ် ..
အနှစ်သာရ ပါးလျတဲ့ သာယာမှုတွေ မရှာဖွေတော့ဘူး ..
ချီးမွန်း ထောပနာသံနဲ့ ဂုဏ်ဒြပ်တွေကို ချန်ထားရစ် လာနိုင်တယ် .. 
အထင်သေး နှိမ့်ချခံရခြင်းတွေဟာ .. နေရာပေး အရေးတယူ ပြုနေဖို့ မလိုအပ်တော့ဘူး ဆိုတာ လက်ခံလာနိုင်တယ် .. ။

စိတ်ဟာ ..
ဘယ်အရာကိုမှ ဆွဲကိုင် သိမ်းဆည်း မထားတော့တဲ့အခါ ..
အနှောင်အဖွဲ့တွေကနေ ပြေလျော့လာတယ် .. လွတ်လပ် ပျော့ပြောင်းလာတယ် .. ။
နာကြင်မှုဟာ အမှတ်သဲခြေ ကြီးကြီးနဲ့ .. သိမ်းဆည်းထားစရာ မဟုတ်တော့သလို .. ပျော်ရွှင်မှုဟာလည်း အထူးတလည် ပြန်ထုတ်ကြည့်ရမယ့် အရာ မဟုတ်တော့ဘူး ..။ မျှော်လင့်ထားတာတွေ ဖြစ်မလာလို့လည်း .. စိတ်ပျက်လက်ပျက် ဖြစ်မနေတော့ဘူး .. မျှော်လင့်တာတွေ ဖြစ်လာလို့လည်း .. မထိန်းနိုင် မသိမ်းနိုင် စိတ်လှုပ်ရှား မနေတော့ဘူး ..။

လွတ်လပ်လာတာနဲ့အမျှ .. စိတ်ဟာ ကျယ်ပြန့် သိမ်မွေ့လာတယ် ..။
စိတ်ရဲ့ ကျယ်ပြန့်မှုကြောင့် .. ရိုးရာ "အစွဲ" ပေါင်းများစွာကနေ လွတ်မြောက်ပြီး .. လက်မခံနိုင်ခဲ့တဲ့ အကြောင်းအရာတွေကို .. လက်ခံနားလည်ပေးနိုင်လာတယ် ..။ သိမ်မွေ့လာတဲ့ စိတ်ဟာ .. နက်ရှိုင်းတဲ့ မေတ္တာတရားရဲ့ ကိုယ်စားလှယ် ဖြစ်လာတော့တယ် ..။

လွတ်လပ်တဲ့ စိတ်မှာ ..
အမှတ်အတေး မရှိ .. အပြစ်တင် စွတ်စွဲလိုခြင်း မရှိ ..
ရန်လိုခြင်း မရှိ .. ဆုံးရှုံးစေလိုခြင်း မရှိ ..

လွတ်လပ်တဲ့ စိတ်မှာ ..
သိမ်မွေ့ခြင်း .. ချစ်ခြင်းမေတ္တာ ..
ခွန်အားပေး မျှဝေလိုခြင်း .. အပြုံးတရားများနဲ့သာ ပြည့်ဝနေပါတယ် ..။ 

-- 99 --
၁၄ အောက်တိုဘာ ၂၀၁၆။

Tuesday, December 6, 2016

"ကိုယ့် စကြာဝဠာ ..။"

ညအချိန်မတော်ကြီးမှ ..
ရုတ်တရက်ဆိုသလို ..
သက်တန့်တစင်း ပွင့်လာလေရဲ့ .. ။

အချိန် မဟုတ် .. အခါ မဟုတ်လို့ ဆိုတော့ ..
သက်တန့်က ရယ်တယ် ..။

"အချိန် .. အခါ .. ဆိုတာထက် ..
အဖြစ်အပျက်နဲ့ ရှုမြင်သူ ..
ဒီနှစ်ခု အကြားက .. နှလုံးသား ထောင့်ချိုးနဲ့ ..
ပိုမို သက်ဆိုင်တယ်ကွဲ့ .."
သက်တန့်က ဆိုတယ် ..။

ဟုတ်တော့လည်း ဟုတ်သား ..
တနေ၀င် .. တနေထွက်မှာ ..
တရစပ် ဖြစ်ပွားနေတဲ့ .. အရာတွေ အကြား ..
ဘယ်တခုကိုများ ကိုယ့်နှလုံးသားနဲ့
ထောင့်ချိုးတခု ဖော်ခဲ့မိပါလိမ့် ..။

ဒီတော့ ..
သက်တန့်က ပြောပြန်တယ် ..
ကိုယ်ကိုယ်တိုင် .. စကြာဝဠာတခု ဖြစ်အောင် "စေ" တဲ့ ..
အဲ့ဒီအခါ ..
ကိုယ်ဟာ .. အရာရာ ..
(တနည်းအားဖြင့် ..)
အရာရာဟာ .. ကိုယ် .. ။

ကိုယ်ဟာ ..
ကောက်ယူ သိမ်းဆည်းထားလို့ မရနိုင်တဲ့ ..
သဲသောင် ကမ်းစပ်ဆီက ..
ဖြူဖြူ မွမွ .. လှိုင်းငယ်တပွေ့ ..

ကိုယ်ဟာ ..
တနေမ၀င်ခင် .. အချိန်မှီ ဆောင်းခိုနိုင်ဖို့ရာ ..
အလောသုံးဆယ် ဖြတ်သန်းသွားနေတဲ့ ..
ကောင်းကင် အစွန်းက ငှက်တအုပ် ..

ကိုယ်ဟာ ..
နွေးနွေးထွေးထွေး .. မြေသားထုထဲ ..
နက်သထက် နက်အောင် ..
တိုးဝှေ့ဆန့်ထွက်နေတဲ့ .. သစ်မြစ်ငယ်ကလေး ..

ကိုယ်ဟာ ..
ဆောင်းဦးမှာ .. ကြွေကျလာမယ့် ..
နောက်ဆုံးရဲ့ နောက်ဆုံးသော .. 

သစ်ရွက်ခြောက်ကလေး ..

ကိုယ်ဟာ ..
တိတ်တိတ်ဆိတ်ဆိတ် .. သစ်တောအုပ်ထဲ ..
မြေမှုန်အထပ်ထပ်တွေ အောက်မှာ .. 

အိပ်မောကျနေရစ်တဲ့ ..
ကျောက်စရစ်ခဲတုံးလေး ..

ကိုယ်ဟာ ..
ကိုယ့်သံစဉ် ကိုယ်သီကုံးလို့ ..
ကိုယ့်ကိုယ်ကိုယ် သယ်ဆောင် ခရီးဆက်နေတဲ့ ..
ပျော်ပျော်ရွှင်ရွှင် .. စမ်းချောင်းငယ်လေး ..

ကိုယ်ဟာ ..
ဆောင်းမနက်ခင်း လေပြေထဲမှာ စီးမြောလာခဲ့တဲ့ ..
သင်းသင်းပျံ့ပျံ့ .. စံပါယ်ပန်း ရနံ့လေး ..

(အဖြစ်ချင်ဆုံးတော့ ..)
ကိုယ်ဟာ ..
လူတကာရင်ထဲ ထိုးဖောက်ရောက်ရှိချင်တဲ့ ..
နူးနူးညံ့ညံ့ အပြုံးပန်းတပွင့် ..

(လောလောဆယ်တော့ ..)
ကိုယ်ဟာ ..
ချစ်သူနှစ်ဦး မေ့လျော့ ထားရစ်ခဲ့လေတဲ့ ..
ခပ်နွဲ့နွဲ့ မြက်ခင်းစိမ်းတွေ ကြားက ..
မြေနီရောင် ဖုန်ထူထူတွေ ..
တနင့်တပိုး .. သယ်ပိုးထားနေရတဲ့ လမ်းသွယ်လေး ..။

နေ့နေ့ .. ညညတွေကို ..
ဒီလမ်းသွယ်လေးထဲကနေ .. မျှော်ကြည့်ခံစား ..
ကောင်းကင်ကြီးဆီ ကိုယ့်လက်တွေ လှမ်း ..
တိမ်တွေကို နမ်းရှိုက်ရင်း ..
အရာရာဟာ .. ကိုယ် ..
ကိုယ်ဟာ .. အရာရာအဖြစ် ..
ရွေ့ .. လျား .. .. .. ။

ဒီညတော့ ..
ဆန်းစ လကွေးကွေးလေးနားမှာ ..
လင်းတစ လက်တစ ..  အရောင်ပြနေမယ့် ..
ကြယ်ပန်းပွင့်လေး ဖြစ်ကြည့်မယ် ..။

အင်း ..
အဖြူ အမည်း .. ရောရှက်နေတဲ့ ဘ၀ထဲမှာ ..
နှလုံးသားရဲ့ ထောင့်ချိုးတွေ ..
သိမ်မွေ့ ညင်သာလာတဲ့အခါ ..
အရောင်အသွေး စုံတဲ့ ..
သက်တန့် အစင်းစင်း ..
အုံ့မိုး ဝေဖြာနေလိမ့်မယ် ..

ဒီအခါ ..
ကိုယ်နဲ့ ကိုယ့်စကြ၀ဠာလေးဟာ ..
ဥတုသုံးပါးအတွက် .. အကူညီဖြစ်စေမယ့် ..
အရောင်စုံ .. ထီးလေးတလက်မျှသာ ..။

-- 99 --
၇ ဒီဇင်ဘာ ၂၀၁၆။